مدونــــتـــي ,,,,,

صعب لامنّـك فشلـت .. وصعـب لامنـك لقيـت
إن من يكره نجاحـك .. يـدري إنـك مانجحـت

أمس ضقت .. ورحت أقلّب ذكرياتي .. وأنتهيـت
عند صورة طفل صوته مثـل صوتـي لاانجرحـت

وش مثـل لا والله إلا هـذا أنـا يـوم ابتـديـت
أنطق حـروف ٍ تلعثـم فـي لسانـي لا أنمدحـت

هذا انـا يـوم الحيـاه فنظرتـي عشريـن بيـت
ومسجدين .. ومدرسه من طين كم فيها اصطبحـت

هذا أنا وأصبحت اتمتم : " هذا انا " حتى بغيـت..
.. أختنق .. بس القدر عيّا على موتي .. وطحـت

وصاح صوت الطفل فيني : " أنت من وين ارتميت"
قلت أنا المستقبل اللي فيـه كـم همـت وطمحـت

أمس كنت أبيك تكبـر .. بـس والله لـو دريـت
أني اللي عشت لأجلـه مـتّ عنـدك وأسترحـت

لو دريت إن الزمان يجـرّ رجلـي .. مـا عديـت
ولو دريت إن البحور بـلا موانـي .. ماسبحـت

كان دربك لي طويـل .. وكـل ماشفتـك هويـت
قلت لك : كبوة جواد .. وما كبيـت إلا وجمحـت

ليه تسمعنـي وتمشـي ؟! آه ليتـك مـا مشيـت
و آه ليتك مـن كثـر عثـرات الأيـام أنتصحـت

ضاعت احلامي .. وظلّ الحزن فيني .. وأهتديـت
للطريق اللـي يودينـي علـى دمعـي .. ورحـت

يالحزن .. ليتـك مثـل دمعـي وتنـزل لا رقيـت
بس أعرفك .. لو مسحت الدمع تبقى ما انمسحت !

كان حلمي .. في وجود إنسـان يبكـي لا بكيـت
وصار حلمي .. في وجود إنسان يفرح لا فرحـت

كنت أشوف الناس مثلي كل مـا جعـت وضميـت
مادريت إن الأوادم ناس فـوق .. ونـاس تحـت

آه يـاأول ذكرياتـي خذنـي فحضنـك نسـيـت
لأسألك عن وجه ابوي اللي معـه يامـا سرحـت

خذني فحضنك أبغفـى .. يـاه مبطـي ماغفيـت
وإن لمحت دموع عيني .. سـو نفسـك مالمحـت

خذني فحضنك .. وبعثر في جروحي وإن قضيـت
هزّ لي كتفي .. وقل لي : عيب تبكي لـو سمحـت

إضحك .. وعلّم زماني من أنا .. ومن وين جيـت
طقّ باب الحزن .. واصـرخ فـيّ لامنـي فتحـت

و ضمّني يمّك .. وكمّـل ضحكتـك لامـن بكيـت
ودي أذكر كيف كانت ضحكتـي لامـن فرحـت !